September 21st, 2017

Aelan

Jinhen khoon khel acha lagta hai
Jo nafraton ke payambar baney baithey hain
Woh jo apni barf posh chatton taley
Mil baith kar likhtey hain kahaniyan
Hamari khoon alood deewaron kee
Hamarey jismon ke tukron kee
Hamari Girti huwi chatton kee,
Aur dehaktey Jhulastey Gharon kee.

Woh jo yeh faisaley karney lagey hain
Ke kis ko haq hai saans leney ka
Aur kis ka ghar laut jana mumkin nahin
Woh jo yeh samajhtey hain
Keh meelon duur baith kar
Samadaron paar baith kar,
Woh hamarey jismon ke lotharon ke,
Hamarey hathon ke,
Hamarey pairon ke,
Hamarey khwabon ke,
Aur…
Hamari Aahon ke
Anbaar laga saktey hain
Woh jo hamari sanson ke ukharne kee dhun banatey hain
Woh jo hamara sheeraza bikharne kee lae sunatey hain
Woh jo insaaniyyat ke bun ke alambardar,
Insanon ko ghun lagatey hain
Woh jaan len…
Keh Aaaj…
Bohat huwa!

Aaj hum bebasi ka libada utarey detey hain,
Aaj hum bekasi ka dhara morey detey hain,
Woh jaan len,
Keh aaj hum apni sarhadon kee,
Khud hifazat karney ka azm uthatey hain.
Apni sanson ko khud dao pe lagatey hain.
Woh jaan len,
Keh aaj hum un ki taraf aatey hain.

Phir roo-e-zameen par,
Woh apna haami-o-nasir dhoond len,
Jis ghaar main chahen ja chuppen,
Ya aasmanon tuk main makaan karen,
Hum har boond ka hisaab chukain ge,
Har aansoo ka darya banayen ge,
Lehron main samandar chupain ge.
Hum badalon se garaj churayen ge,
Allah kee zameen ko tung kartey jayen ge.
Hum har saans lutayen ge,
Magar tum ko kaifar-e-kirdaar tuk layen ge.

Yeh Va’ada raha,
Yeh qasam rahee,
yahee aaj hamara
Aelan-e-jung raha.

Tum dabak jao,
Ya dehak jao,
Jhulas jao,
Ya Dehal jao.
Laakh tum taweelen karo,
Hazaar Qahar lao!
Chaho…
To khud apne haathon zehar khao!

Ab humen rukna yaad nahin,
Tum raham ke haqdar nahin,
Aur darguzar ke ab hum rawadar nahin,
Ab waqt hamara hai,
Dhaar hamari, aur Sar tumhara hai

Yeh Va’ada raha,
Yeh qasam rahee,
Yahee Aelan-e-jung hamara hai.

2 Responses to 'Aelan'

  1. 1BaptizedLucifer
    June 23rd, 2011 at 11:46 pm

    Ufh, isay parhtay parthay to chaar saal lag jaein.


  2. 2knicq
    July 8th, 2011 at 2:15 am

    Bibi lucy, maazi qareeb pe nazar kee jaye to pata chaley ga keh char salon main is blog par mazeed kuch parhne ke liye hamare un-ginat qariyeen ko kuch muyassar na ho ga… yehi wajah hai, keh qariyeen kee dil bastagi ka saman mohayya kar diya hai. :)


Leave a Response

Imhotep theme designed by Chris Lin. Proudly powered by Wordpress.
XHTML | CSS | RSS | Comments RSS